الأمن السيبراني - التحقيق الرقميشنو هي ExifTool؟
هي أداة مفتوحة المصدر (يعني مجانية وتشتغل على أغلب الأنظمة: ويندوز، لينُكس، ماك) وتستخدم حتى تقرأ أو تعدّل البيانات الوصفية (metadata) الموجودة داخل الملفات.
شنو يعني metadata؟
هي معلومات تنخزن داخل الملف بدون ما تظهر ضاهرياً للمستخدم العادي. مثلاً صورة مصورة بكاميرا ممكن تحتوي معلومات مثل:
- نوع الكاميرا
- موقع التصوير (GPS)
- وقت وتاريخ التصوير
- إعدادات الكاميرا (ISO، فتحة العدسة)
- وحتى اسم صاحب الجهاز أحيانًا
ليش تهمني هاي المعلومات؟
- إذا جنت باحث أمني، ممكن تكتشف معلومات حساسة داخل صورة نزلها أحد على الإنترنت.
- إذا جنت مصمم أو فوتوغرافر، ممكن تحب ترتّب صورك حسب الكاميرا أو التاريخ.
- أو حتى بالتحقيقات الجنائية الرقمية، يستخدموها حتى يعرفون مصدر الصورة أو يحللون التوقيت والمكان.
طريقة التثبيت:
على لينُكس:
sudo apt install libimage-exiftool-perl
على ماك (إذا عندك Homebrew):
brew install exiftool
على ويندوز:
تنزلها من موقعها الرسمي:
https://exiftool.org
وبعدها تفك الضغط وتثبتها عن طريق Setup.exe.
طريقة الأستخدام:
1. عرض كل الـMetaData داخل صورة:
exiftool image.jpg
راح يطلعلك جدول بكل التفاصيل المخفية داخل الصورة.
2. استخراج معلومة معينة:
exiftool -DateTimeOriginal image.jpg
راح يطبع بس وقت التقاط الصورة.
3. إزالة كل الـMetaData من الصورة (خصوصًا مفيد للخصوصية):
exiftool -all= image.jpg
ملاحظة: يسوي نسخة من الصورة ويحتفظ بالأصل.
4. تعديل معلومة داخل الملف:
exiftool -Artist="SuperCyber" image.jpg
راح يضيف اسمك كمصور للملف.
5. استخراج بيانات GPS:
exiftool -gpslatitude -gpslongitude image.jpg
إذا الصورة بيها معلومات الموقع، راح يطلعلك الإحداثيات.
شنو أنواع الملفات اللي تدعمها ExifTool؟
- JPEG, PNG, TIFF, RAW
- MP4, MOV, AVI
- وملفات الصوت مثل MP3
يعني حتى فيديو نزّلته من الإنترنت تقدر تفحصه وتشوف إذا بيه معلومات GPS أو اسم المصور الأصلي.