شنو هو WSL؟

هي ميزة مدمجة بويندوز (من نسخة Windows 10 فما فوق) تسمحلك تشغل توزيعات لينكس مباشرة على النظام، بدون لا تحتاج محاكي ولا Virtual Machine. يعني تكتب أوامر لينكس كأنك تشتغل عليه فعليًا، بس كلشي يصير داخل ويندوز.

وهذا الشي يساعد هواي خصوصًا بمجال الأمن السيبراني، لأن ممكن تحتاج أدوات مثل nmap، ، sqlmap وغيرها، اللي تنزل بسهولة على توزيعة مثل Kali Linux.

شلون تثبت Kali Linux على WSL؟

1. فعل WSL على نظامك:

افتح PowerShell كـ "Administrator" وطبّق هالأمر:

wsl --install

هذا راح يفعّل WSL وينزل توزيعة Ubuntu بشكل افتراضي. بس إحنا نريد Kali، فراح نضيفها يدويًا.

2. نزل Kali Linux من Microsoft Store

• افتح Microsoft Store
• ابحث عن "Kali Linux"
• اضغط "Install"

بمجرد ما تخلص من التنزيل، راح تظهر عندك نافذة تطلب إنشاء اسم مستخدم وكلمة مرور (خاصة بـ Kali، مو ويندوز).

3. أول شي بعد التثبيت:

تدخل للـ Kali من قائمة Start، تكتب:

sudo apt update && sudo apt upgrade -y

وبعدين تكدر تثبت كل الأدوات اللي تحتاجها مثل:

sudo apt install nmap sqlmap hydra

أو تكدر تستخدم أداة kali-linux-top10 لتثبيت أهم 10 أدوات الاختراق:

sudo apt install kali-linux-top10

المميزات :

• ماكو داعي تسوي Dual Boot أو Virtual Machine
• تشتغل بسرعة وبدون استهلاك عالي للموارد
• تكدر تنقل ملفات بين ويندوز ولينكس بسهولة
• متوافقة مع بيئة العمل الحقيقية إذا تشتغل بـ Bug Bounty أو Pentesting

شلون أشتغل بيها؟

كل ما تحتاجه هو تكتب "Kali" بالبحث، تفتح الـTerminal، وكأنك دا تشتغل على لابتوب كالي فعلي. تنفذ أوامرك، تسوي Scan، تحليل، واللي تريده.